FEMO International олимпиадасының қысқы кезеңі өтті

 Әлем бойынша 19 елдің басын біріктірген FEMO International олимпиадасының қысқы кезеңі қорытындыланды. Fizmat Academy және Республикалық физика-математика мектебінің ұйымдастыруымен биыл VII мәрте өткізілген білім додасына 2500 жуық оқушы қатысты.

Отандық олимпиадаға Қазақстанмен қатар Әзірбайжан, Қырғызстан, Өзбекстан, Германия, Ұлыбритания, АҚШ, Беларусь, Түркия, Сауд Арабиясы, Грузия, Тәжікстан, Австрия, Испания, Коста-Рика, Норвегия сынды елдердің жас математиктері ерекше қызығушылық танытқан. Қазақстан бойынша Астана, Алматы, Орал, Ақтау, Атырау, Шымкент, Павлодар, Өскемен қалалары мен Әзірбайжан, Қырғызстан, Германия және Тәжікстан елдерінің оқушылары олимпиадаға оффлайн қатысса, өзге өңірлер мен елдердің 1-5 сынып оқушылары олимпиада тапсырмаларын онлайн орындауға мүмкіндік алды.

«Менің ойымша бұл олимпиада оқушылардың математикаға, олимпиадаға қатысуға деген құлшыныстарын арттырады. Мен есептерді шешуде қатты қобалжыған жоқпын. Femo олимпиадасына жақсы дайындықпен келдім. Дайындық кезінде аптасына 20 есептен шығарып жүрдім. Кез келген жарыста жеңу үшін көп еңбектену керек» – дейді  5- сынып оқушысы Азат Мұздақ. 

    Femo International-дың ұйымдастыру комитеті аталған білім сайысының жыл сайын аудиториясы кеңейіп, тапсырмалар мазмұнының да тереңдетіле түскендігін тілге тиек етеді.

Әрі бұл олимпиада бастауыш сынып оқушыларын ғылымға баулудың алғышартына да айналуы әбден мүмкін.

Жанна Жүнісова, «Fizmat Academy» орталығының директоры

«Жалпы алғанда Femo – тек таланттарды тану платформасы ретінде ғана емес сонымен бірге Қазақстанның әлем елдерімен білім саласындағы байланысын бекемдеп, халықаралық ынтымақтастығын арттыруға да айрықша ықпал ете түсуде. Бұл олимпиада алдағы уақытта тек жарыс ретінде ғана қалмай нағыз даму мен достықтың мектебі ретінде танылса екен дейміз»

Айта кету керек, олимпиада нәтижелері қатысушылардың электрондық мекенжайларына 2024 жылдың 17 желтоқсанында ал 18 желтоқсанда сертификаттар мен дипломдар жіберіледі. 2024 жылдың 19-20 желтоқсан күндері жеңімпаздар мен жүлдегерлердің тізімі www.femo.kz. ресми сайтында жарияланады.