Дарынды бала – ұлт болашағы

Бүгін 7 «А» сыныбында Тәуелсіздік күніне орай «Дарынды бала – ұлт болашағы» тақырыбында Физматтың алғашқы түлегі, математика пәнінен бірнеше республикалық, халықаралық олимпиада жүлдегері, бүгінде Назарбаев Университетінің ІІ курс студенті Нарбаев Бақдәурен Серікұлымен кездесу өткізілді.

Баршамызға белгілі 2019 жыл Жастар жылы болып жарияланды. Бүгінгі кездесудің басты мақсаты да осы болып табылады. Кездесу барысында оқушылар мен ата-аналар Бақдәуренге жетістікке жетудің құпиялары, бос уақытын қалай өткізеді, алдағы жоспарлары қандай, т.б. мәселелер жөнінде сұрақтар қойып, өз ой-пікірлерін білдірді. Қойылған сұрақтарға нақты дәлелдермен жауап беріп, болашақта ғылымға бет бұратындығын айтты. Тіпті оқушыларымыз оны «сынамақ» болып есепте шығартты. Сонымен қатар, Бақдәурен Секен Тұрысбековтің «Ақжауын» күйін нақышына келтіріп орындап берді. Сынып оқушылары да өз өнерлерін ортаға салып, мерекеге арналған жыр-шашулары мен «Атамекен» әнін орындады.

Кездесу барысында мектеп директоры Қалиев Руслан Серікұлы өзінің жас дарынға деген тілегін білдіріп, Физматтың түлегі қандай болу керектігін айтты. Себебі өзі де Алматы қаласындағы Физмат түлегі. Сонымен бірге Бақдәуренге «Алғыс хат» табыстады. Сынып ата-аналары да осы кездесуді ұйымдастырған Гүлжазира Бекболатқызына ризашылық сезімдерін білдірді. Сынып оқушылары алдағы күнге деген зор сенім, көп әсер алғанын айтты.