Қазақстан Республикасының Оқу-ағарту министрі Ғани Бейсембаев Астана қаласындағы Республикалық физика-математика мектебінде болды

Қазақстан Республикасының Оқу-ағарту министрі Ғани Бектайұлы республикалық және халықаралық олимпиадалардың (IJSO – 2023, Халықаралық Жәутіков олимпиадасы – 2024) және “Зерде”- 2024 ғылыми жобалар конкурсының қорытынды кезеңінің жеңімпаздарымен және жүлдегерлерімен кездесті. Мектеп базасында iOS-бағдарламалауды оқытатын заманауи зертханасымен таныстырылды. Ол жерже оқитын WRO-2023 және FLL-2023 робототехника олимпиадасының жүлдегерлері министрге өз жобаларын ұсынды. Сабақтарды біздің мұғалімдеріміз, Apple сертификатталған жаттықтырушыларымыз өткізетінін атап өткен жөн.

Педагогтермен кездесу барысында Ғани Бейсембаев еліміздегі білім беруді дамыту перспективаларына, сондай-ақ ведомство тарапынан қабылданып жатқан шараларға тоқталды. Министрдің айтуынша, білім беру сапасын арттыруда білікті кадрлар мен менеджерлерді даярлауға ерекше көңіл бөлінеді.

«Жарты ғасырлық тарихы бар Республикалық физика-математика мектебі еліміздегі осы бағыттағы білім ошақтарының ішіндегі мықтылардың бірі. Мектеп түлектерінің қатарында: үздік педагогтер, ғалымдар, инженерлер, IT-мамандар бар. Бұл тәжірибені одан әрі дамыту қажет. Біз білім берудегі инновациялық трендтерді қалыптастыруға ықпал ететін жаңа жобаларды қарастырып жатырмыз», – деп атап өтті министр.