Ауыл оқушыларыны арналған «Мың бала» ұлттық олимпиадасы

19 ақпанда ауыл оқушыларының «Мың бала» ұлттық олимпиадасына арналған баспасөз конференциясы өтті. Қазақстан Республикасының Оқу-ағарту министрлігі «El Umiti» қоры» корпоративтік қорымен серіктестікте бесінші жыл қатарынан 6 сынып оқушыларына арналған «Мың бала» ұлттық олимпиадасын өткізуде. Баспасөз конференциясына «Республикалық физика-математика мектебі», «Білім инновациялық лицейі» және №2 облыстық мамандандырылған мектеп интернатының мектеп директорлары, өткен жылдардағы олимпиада жеңімпаздары мен олардың ата-аналары қатысты.

«Мың бала» олимпиадасы – ауылдық жерлердегі дарынды балаларды анықтайтын және оларға қолдау көрсететін аса маңызды жобалардың бірі. Төрт жыл ішінде олимпиадаға ауыл мектептерінде оқитын 671 мыңнан астам 6-сынып оқушысы қатысты. Олардың арасынан 4000-ы олимпиада жеңімпазы атанды, 1374 оқушы дарынды балаларға арналған мектептерге қабылданды. «Мың бала» олимпиадасына қатысу тегін. Биылғы «Мың бала» олимпиадасына тіркелу 10 ақпан мен 10 наурыз аралығында 1000bala.elumiti.kz сайтында өтеді.

«Мың бала» олимпиадасы екі кезеңнен тұрады. I-кезең онлайн форматта өтеді. 5-10 сәуір аралығында 1000bala.elumiti.kz сайтында тестілеуден өту қажет. Тестілеу екі бөлімнен тұрады: логикалық ойлау, кеңістіктік ойлау. Тест 40 сұрақты қамтиды және шамамен 90 минутты алады. Тестілеуден камерасы бар ноутбук арқылы немесе интернетке қосылған веб-камерасы бар компьютерден тапсыруға болады. Сондай-ақ, қатысушылар тестілеуден өз мектептерінде немесе өңірлік «Дарын» орталықтарында өте алады.

Облыстап бойынша ең жоғары қорытынды балл жинаған бес мың оқушы олимпиаданың II кезеңіне өтеді.

Олимпиаданың екінші кезеңі 24-26 сәуір аралығында өтеді. Бұл кезеңде қатысушылар мынадай пәндер бойынша академиялық білімдерін бағалау үшін компьютерлік тестілеуден өтеді: математикалық сауаттылық, қазақ тілінде оқытатын оқушылар үшін қазақ тілі, орыс тілінде оқытатын оқушылар үшін орыс тілі, ағылшын тілі, жаратылыстану. Тест 100 сұрақтан тұрады және 150 минутқа созылады.

Олимпиадаға дайындалу үшін https://ro.elumiti.kz/ сайтында өткен жылдардағы тест тапсырмаларына дайындалуға мүмкіндік беретін тренажер жұмыс істейді. Апелляциялық шағым қарастырылмаған. Үздік нәтиже көрсеткен қатысушылар Дарын, БИЛ және РФММ сияқты мамандандырылған мектептерде оқуға түсу мүмкіндігіне ие болады.