РФММ мұғалімі «Ерен еңбегі үшін» төсбелгісімен марапатталды

Астанада Білім басқармасының ұйымдастыруымен QAZAQSTAN орталық концерт залында Ұстаздар күніне арналған «Ұстаз – ұлттың шамшырағы» атты салтанатты мерекелік концерт өтті. Іс-шараға елорданың 3 мыңға жуық педагогі мен еліміздің барлық өңірінен келген үлгілі ұстаздар жиналды.

Мерекелік кешке Оқу-ағарту министрі Жұлдыз Сүлейменова қатысып, барша ұстазды құттықтады. Салтанатты шара барысында министр білім саласын дамытуға зор үлес қосқан педагогтерді «Ерен еңбегі үшін», «Шапағат» және «ҚР Еңбек сіңірген ұстазы» медальдерімен марапаттады.

Осы күні ерекше қуанышқа бөленгендердің қатарында Республикалық физика-математика мектебінің Алматы қаласындағы филиалының математика пәнінің мұғалімі Ахметова Ғалия Зейноллақызы да бар. Ол отыз жылдан астам уақыт бойы математикадан сабақ беріп келе жатқан тәжірибелі де білікті ұстаз. Ғалия Зейноллақызына «Ерен еңбегі үшін» төсбелгісі табысталды.

Бұл марапат – ұстаздарға деген үлкен құрмет пен еңбектерінің лайықты бағалануы деп білеміз.

Прикрепленные файлы