Үздік педагогтер марапатталды

Республика күнінің қарсаңында Оқу-ағарту министрі 64 ұстазға «Үздік педагог» атағын тапсырды. Жеңімпаздар марапатпен бірге 1000 АЕК көлеміндегі сыйақыға ие болды.
2025 жылдың «Үздік педагогі» атанған ұстаздар қатарында «Республикалық физика-математика мектебі» КеАҚ Астана филиалының қос ұстазы бар. Олар:
Салимов Алмаз Баймарзаұлы – физика пәнінің мұғалімі. Физика кафедрасының меңгерушісі. Бірнеше жылдан бері олимпиада және білім бәсекелерінің жеңімпаздарын даярлап жүрген тәжірибелі ұстаз.
Паникарская Наталья Юрьевна – математика пәнінің мұғалімі.
Математика кафедрасының меңгерушісі. Республика физика-математика мектебінің Астана қаласындағы филиалы ашылған жылдан бастап еңбек етіп келеді. Бірнеше жылдан бері олимпиада және білім бәсекелерінің жеңімпаздарын даярлап жүрген тәжірибелі ұстаз.

Айта кету керек, биылғы жылы «Үздік педагог» республикалық байқауының іріктеу кезеңіне 1468 маман қатысып, одан өткен 793 педагог облыстық деңгейде бақ сынады. Дәстүрлі конкурстың финалдық кезеңіне 174 маман жолдама алған болатын.

Бұл сайысқа білім беру ұйымдарында бес жыл үздіксіз еңбек өтілі бар мамандар қатыса алады. Конкурс барысында педагогтердің білім беру жүйесін дамытуға қосқан үлесі, жұмысының тиімділігі мен кәсіби шеберлігі ескерілді.

Жүзден жүйрік атанып, жеңіс тұғырынан көрінген үздік ұстаздарымызды шын жүректен құттықтаймыз!