РФММ оқушылары Мемлекет басшысының марапатына ие болды

Ақордада Мемлекет басшысы Қасым-Жомарт Тоқаев халықаралық пән олимпиадаларының жеңімпаздары мен жүлдегерлерін қабылдады.

‍‍ Іс-шараға 24 лауреат қатысты:
4 алтын
11 күміс
9 қола

Оқушылар химия, математика, физика, география, информатика және биология пәндерінен жоғары нәтижелер көрсеткен.

Президент жас дарын иелерін білім саласындағы жеңістерімен құттықтап, еңбектеріне жоғары баға берді:

«Жүзден жүйрік, мыңнан тұлпар шығу, әлемдік жарыста жеңіске жету оңай емес. Білімге деген ұмтылыстың, нағыз еңбекқорлық пен табанды іс-әрекеттің арқасында осындай биікке шығып жатсыздар. Расында, дарынға ие болу, бұл – бақыт. Бірақ жай ғана еңбексіз дарын жетістіктің кепілі бола алмайды. Дарынның көзін ашу керек және оны толығымен пайдалана білу қажет. Әр жеңіс, әр медаль тынымсыз ізденіспен, маңдай термен, үздіксіз дайындықпен келеді», – деді Мемлекет басшысы. ✨

Марапатталғандардың қатарында «РФММ» КеАҚ Алматы филиалының оқушылары да бар:

Амир Сахипов – Австралия, Саншайн-Кост қаласында өткен халықаралық математика олимпиадасының күміс жүлдегері;

Максим Цой – Боливия, Сукре қаласында өткен информатикадан халықаралық олимпиаданың күміс медаль иегері.

Бұл олимпиадалар әлемдегі ең беделді білім сайыстарының қатарына жатады.

Физмат мектебі 2025 жылы 30-дан астам халықаралық білім додасында 120-дан артық медаль жеңіп алды.