Ұлттық мұражайға саяхат

«РФММ» КеАҚ филиалының 5А сынып оқушылары Қазақстан тарихы пәнінен «Сақтар» тарауының аяқталуына байланысты, тарауды қорытындылауға арналған мұражай сабағына қатысты. Мұражай сабағының бағдарламасы бойынша балалар оқулыққа әлі енбеген «Тақсай патшайымы» мен «Елеке Сазы Алтын адамы» туралы презентация тыңдап, «Сақ-скиф аңдық стилі» туралы көрнекі ақпарат алды. Жаңа ғылыми жаңалықтар туралы мәліметтерді сүйсіне тыңдап, уысына сіңірген оқушылар, музейдің ғылыми ғызметкерлері П. Мұсырманқұл, А. Құрманғалиев, А. Молдахмет сияқты археолог ағайларына көптеген сұрақтарын қойып, тойымды жауаптарға кенелді. Күшті белсенділік танытқан оқушылар семинар соңында қазыналы оқулықтармен марапатталды.

Семинардан кейін балаларға мұражай қызметкерлері тегін экскурсия ұйымдастырды. Бұл экскурсия барысында балалар тек музей жәдігерлерін ғана тамашалап қоймай, сабақ барысында меңгерілген ақпараттарды бекіту мақсатында ұстазы А. Б. Көптілеуованың алдын-ала дайындаған тапсырмаларын орындап жүрді. Тарих сабағында тек суреттерден тамашалаған олжаларының шынайы нұсқаларын өз көздерімен көрген балалардың қуанышында шек болмады. Қазақ даласынан табылған барлық саны «Жеті» алтын адам мен «мұз басқан Берел» қорымдарының экспонаттарын түгендеп болған оқушылар, олардың реконструкцияларының алдында және де музейдің кіреберісіне орналастырылған Елбасының мүсінінің алдында естелік суретке түсті.