Бастауыш мектеп апталығы

Апталықтың негізгі мақсаты — бастауыш сынып оқушыларының құқықтық мәдениетін қалыптастыру, адалдық, жауапкершілік, тәртіп және азаматтық құндылықтар туралы түсініктерін кеңейту. Бес күн бойы 1–4 сынып оқушылары түрлі танымдық, тәрбиелік және интерактивті іс-шараларға белсенді қатысты.

Апталықтың салтанатты ашылуы 19 қаңтар күні өтті. Осы күні 2–4 сынып оқушылары арасында «Мектептің қауіпсіз болуы үшін мен не істей аламын?» тақырыбында шағын сауалнама жүргізіліп, бейнероликтер әзірленді. Оқушылар жеке жауапкершілік, өзара сыйластық пен қауіпсіз мектеп ортасын қалыптастыру мәселелері бойынша өз ойларын ортаға салды.

20 қаңтар күні іс-шаралар мазмұны жағынан аса ауқымды болды. 2–3 сынып оқушыларына арналған «Болады — болмайды» атты интерактивті ойында мінез-құлық нормалары мен күнделікті өмірдегі жағдаяттар талқыланды. Ал 1-сынып оқушылары «Заң және тәртіп» квестіне қатысып, логикалық тапсырмалар мен командалық жұмыс арқылы білімдерін көрсетті.

Сондай-ақ осы күні оқушылар Ардақ Мамырбекұлы Сансызбаевпен — полиция полковнигі, отставкадағы қызметкер, ҚР Бас прокуратурасының бұрынғы прокурорымен кездесті. Кибербуллинг тақырыбындағы кездесу барысында балалар цифрлық ортадағы қауіпсіздік пен өзара құрметтің маңызын түсінді. Сонымен қатар «Тәртіпті сақтауға кім көмектеседі?» атты панельдік сессия өтіп, оқушылар мектептегі тәртіп пен қауіпсіздікке жауапты мамандардың қызметімен танысты.

21 қаңтар күні бастауыш сынып оқушылары балалар жазушысы Мадина Омармен кездесті. «Айша және қауіпсіздік ережелері» кітабы негізінде өткен кездесуде екінші сынып оқушылары адамгершілік, жауапкершілік пен тәрбие туралы әңгімелесті. Ал бірінші сыныптарға арналған «Тәртіпті кім орнатады?» ойыны арқылы балалар өз білімдерін бекітті.

22–23 қаңтар күндері «Заң және тәртіп әлеміне саяхат» атты ойын сабақтары мен «Жол қозғалысы ережелерінің жас білгірі» байқауы өткізілді. Апталықтың қорытынды іс-шарасы ретінде 3–4 сынып оқушылары адвокат Сағынғали Нұрхатұлы Елеуовпен кездесіп, құқықтар мен міндеттер, әділдік ұғымдары туралы қарапайым әрі түсінікті ақпарат алды.

Апта бойы мектепте «DosbolLike» сурет көрмесі жұмыс істеп, сынып сағаттары мен тақырыптық әңгімелер ұйымдастырылды. Барлық іс-шаралар оқушылардың жас ерекшеліктерін ескере отырып, қызықты әрі қолжетімді форматта өткізілді.

Қазіргі таңда Астана филиалының бастауыш мектебінде 19 сынып білім алуда. Апталық барысында барлық сыныптарда тақырыпқа сай ашық сабақтар өткізілді, оқушылар жоғары белсенділік танытты.

Аталған апталық бастауыш мектеп оқушыларына заң мен тәртіптің маңызын ерте жастан ұғындырып, жауапты, адал және белсенді азамат ретінде қалыптасуына ықпал етті.